孫耀威、葉芷如、陳欣妍、方力申、洪天明、麥長青噚日出席冼國林執導新片《我們的6E班》喺九展舉行嘅慈善首映禮。

新婚孫耀威未見同太太陳美詩（Macy）一齊出席，佢話：「佢幫我睇住舖頭嘛，不過有諗過遲啲包場同粉絲一齊睇戲。」老孫話以前有粉絲鬧佢嘅女朋友「死女人」、「睇你幾時死」，甚至會爆粗、說話幾難聽都有：「仲有粉絲着三點式，甫相話自己身材比Macy好！當時睇到我好心痛，可能o依家已成定局，大家開始要理智。」

洪天明同太太周家蔚就一齊去首映，家蔚明顯瘦咗一個圈，佢仲話：「佢（天明）去咗大陸做嘢，我唔係好敢出去食嘢，驚唔知食咗啲乜落肚。佢返嚟我即刻交兩個仔畀佢湊，我唔得嘞！」家蔚話早前以為自己有咗：「佢叫我買驗孕棒，我即刻諗幾時嘅事，最後發現原來搞錯咗。」講到佢兩個話想生女，原來係爺爺洪金寶俾壓力：「有壓力㗎，爸爸想抱孫女，如果係會係呢兩年內嘅事。會去外國睇醫生，肯定係生女先得，我o依家都傾緊去美國拍嘢，係就順便搞埋，一舉兩得。」