噚日facebook俾好多名人嘅水底照洗版，最吸睛當然係欣宜嘅美人魚造型喇，睇睇下，發現兩個財經界熟識嘅面孔，就係中原地產老闆施永青同埋股評人胡孟青，佢哋全部都係為推廣下月18日舉行嘅「新世界維港泳2015」而落水嘅。
青姐話，大會今年特別從本港不同界別，邀請不同人物影水底相，希望透過社交媒體推廣下月維港泳（已截止報名，純推廣）。佢同施永青上月初拍照，地點係恒生商學院室內泳池，大會要求大家保密，直至噚日中午先將相片放上facebook。

水底擺姿勢　閉氣最難

青姐今次影水底相屬義務性質，佢自己嗰部份，喺水底斷斷續續花咗一個半小時，先係有教練教佢閉氣，再落水拍攝。因為佢唔熟水性，所以覺得閉氣最難，不過佢都可以keep到每次閉氣1分鐘畀攝影師影相。
除咗閉氣，最難係要沉到落水底擺姿勢，佢同施永青着住套裝、西裝，工作人員就將多嚿鉛放入佢哋嘅袋，青姐自己袋咗5嚿，一上水就要工作人員幫手拎走啲鉛先行得郁。施老闆都話，落水初時浮得滯，要加多幾嚿鉛先控制到沉落水嘅姿勢。
唔講唔知，施老闆游過3次渡海泳，第一次喺上世紀70年代，2011年復辦同舊年都有參加，今年照樣報名，佢形容由九龍游去港島係挑戰。至於青姐，佢話最叻游泳池，唔會參賽。換言之，大家下月睇唔到水着青姐了。

李華華
mailto:[email protected]