如果話「歌神」許冠傑嘅歌喺打工仔心聲，張武孝（大AL）嘅歌會更加草根同貼地，一句「行快啲啦喂」道盡香港人死唔蝕、怕執輸嘅心境。唱得之餘，亦演得，參演過電視同電影，但原來大AL仲好跑得。

喺今年1月，自言同譚校長同年、同係68歲嘅大AL參加咗香港年度馬拉松盛事，跑完42公里，仲貼相到自己個facebook，對於一名業餘、而且年紀唔輕嘅跑手嚟講，相信唔係一件易事。

大AL早前喺佢主場沙田接受《蘋果》訪問時話，佢話今次唔係第一次完成全馬，只不過近兩年報唔到名，佢話：「前兩年報唔到名，你知好難報名，對上一次係14年跑過。其實跑步唔係計成績，目標係完成同可以當做一個身體測試，跑嘅時候就會知邊個部份有問題、弱咗。」

大AL話自從13年前戒煙後，就愛上長跑，佢話初初只係諗住「談下戀愛」，希望身體好，點知愛上之後唔見「佢」唔得：「比賽只係目標，因為有比賽，就會令你積極有心機。跑過澳門馬拉松，我習慣去到全世界都會跑步，去溫哥華Stanley Park跑一個圈8.5公里，一個鐘左右跑完，呢度係最靚跑步地方；澳洲由歌劇院個公園跑、倫敦海德公園好細，35分鐘跑完一個圈；阿姆斯特丹跑公園，唔跑街，因為條條河都一樣，驚蕩失路，而珠海會沿住海傍跑。」

提到跑步時嘅必備物品，大AL話最緊要係耳機同電話，佢解釋：「聽音樂好重要，可以延續麻醉自己，最近鍾意聽jazz。」對於跑馬拉松，大AL話有個願望，就係跑到70歲，當然都要睇報唔報到名，目標自然係全馬。佢提到今年跑全馬嘅戰略，就係要喺兩個半鐘內完成半馬，佢話：「最難捱去到西隧長命斜，國際選手都話辛苦，去到嗰度已經34、35公里，嗰時腳趾公又痛，又想抽筋，之後去維園嗰幾公里已經係捱。」

精選娛聞，喺晒《娛果》
http://fb.com/appledailyent