元旦遊行，事先冇乜人吹雞，土共老左，亦冇瘋狂搞㷫市民把火，當前時局，亦冇乜棘手迫切議題，冇咗23條，兼且阿蟲葉劉相繼落台，之不過，是是但但人數咁又十萬，求求其其，都重不棄不離，人山人海，場面一樣咁壯觀，唔知阿董會唔會好聰明咁諗：嘩，7.1遊行有五十萬，元旦就有十萬，咁咪即是多咗四十萬人支持我？
中產旅行唔得閒
以老人家六年幾以來所展示嘅大腦思維質素指數，佢若果咁諗，諗完又陰陰笑，一啲都唔出奇。元旦遊行十萬人，據專家分析，有幾點心得：
第一，上次7.1全部係中產階級，今次元旦，撞正中產階級家庭啲仔女，喺英國寄宿學校放假返來，好多一家大細去咗北海道滑雪，或者澳洲大堡礁潛水（冇仔女喺英國讀寄宿中學，排緊隊入劍橋牛津，都唔算中產階級喇係哇？聖誕新年放假，中產階級唔去日本或者澳洲，唔通參加張家界五日遊，團費每位九百九十九？）所以今次就冇咁多中產階級到場嘞。
第二，不過，中產階級少咗，但青少年𡃁仔一樣有，而且，基層草根一樣咁多，職工盟、無居權人士，同埋好多民間壓力團體，一呼照樣百應。「自由行」改善經濟消費，照計冇咁多草根再去遊行，但原來一樣係咁多窮人喎，唔知國家派人落嚟收料嘅嗰啲國安人員，份報告又點樣寫？