【點先練到兩樣】又要肚腩又要腹肌 明禎男友唔係咁易做
林明禎大馬女神
現年27歲嘅「大馬女神」林明禎話未有拍拖,佢想學好廣東話,所以好想交個識講廣東話嘅男仔交流一下,應徵嘅男生當然仲要符合女神擇偶條件。
明禎日前喺銅鑼灣接受《蘋果》專訪,佢好坦白咁話:「如果我要學多啲廣東話,我要一個講廣東話嘅男朋友,想快啲學,有沒有介紹?」明禎嘅條件梗係唔止識講廣東話:「他的國語又要好。」除咗要雙語,外型要靚仔嗎?明禎即答:「唔緊要,我靚就得啦,樣子要陽光,皮膚乜嘢顏色都可以。」事業型嘅明禎繼續話:「我的工作好叻,佢要OK啦,一齊好叻。」
嬌小玲瓏嘅明禎都渴望被保護,佢對另一半身形特別有要求:「身形高大,好呀,可以保護我。肥肥哋,好呀,有士啤軚OK,但要有腹肌畀我攬實。我瞓覺嘅時候,佢肚子就變肚腩,我要去運動時,佢就變腹肌。」明禎好想將來同男友一齊打boxing做運動。愛笑嘅明禎亦想男友搞笑逗佢開心:「有時候搞笑,有時候認真。」明禎呼籲自問夠資格應徵嘅男仔,可以本月29日去九展參加佢嘅「#Me& U派對」演唱會,到場「相睇」喎。
來自大馬檳城嘅明禎,近年長期喺台灣發展,明禎接觸過港男、台男同大馬男,佢話大有分別:「我覺得港男好可愛,有啲啲shy,熱情在心裏,印象最深,有次來港開簽唱會,大家都好安靜,當我唱歌時,大家卻大聲一齊陪唱,我好喜歡這種感覺。台灣的男仔就好直接,看到我會好直接,好瘋狂,也是很可愛。馬來西亞會更加shy,比如說我每次返檳城,總給我家的感覺,每次回去都見到好多熟悉的臉孔。」明禎仔細分析三地男生特點,明禎唔敢亂揀:「我選香港,就對不起台灣跟馬來西亞,我選台灣,也對不起香港跟大馬,就不分國籍吧!」
明禎早前來港拍攝電影《辣警霸王花2不義之戰》,佢戲中扮女警有動作鏡頭,明禎雖發生意外弄傷左腳腳趾韌帶撕裂,但未有被嚇窒,佢竟然打上癮,「我唔驚,好鍾意,下次我會小心啲,武打時係好辛苦,但我睇到拍出嚟就覺好值得。」明禎仲挑機:「真實嘅我係咪好打得,你可以試下,冇人可以欺負我。」明禎鍾意演戲,卻抗拒演花瓶靚女:「(我)已好靚,拍戲時候可以演第二啲角色,我想試吓演精神病人同精神分裂,用感情演戲,我會做多啲功課。」
明禎呼籲自問夠資格應徵嘅男仔,可以本月29日去九展參加佢嘅「#Me& U派對」演唱會