蔡卓妍（阿Sa）唔經唔覺都入咗行好多年，喺演戲方面都做咗好多新嘗試，好似近日喺邱禮濤執導嘅電影《雛妓》入面，雖然佢係飾演一個拯救雛妓嘅女大學生，表面上睇嚟冇乜特別，但係噚日預告片一曝光，就感受到阿Sa原來都可以有好激嘅一面！

華哥讚不絕口

喺呢條預告片度，一開始話阿Sa好關心喺泰國嗰280萬個性工作者，佢去到當地之後，竟然同一位雛妓發展咗一段曖昧關係。不過好戲在後頭，原來阿Sa同任達華關係更曖昧，先見到阿Sa捉住華哥隻手擺喺自己心口，鏡頭一轉就變成激烈床戲，睇見華哥係咁錫阿Sa胸口，最後華哥發晒脾氣話：「交租呀、學費都係我交㗎！」然後阿Sa突然爆出一句：「我有俾你Ｘ㗎！」呢個單字粗口簡直聽出耳油呀！噚晚佢兩個都有現身澳門嘅電影頒獎禮，仲齊齊奪得男女主角，佢哋冇乜點提呢啲激爆場面，但係華哥對阿Sa讚不絕口，阿Sa就話今次係佢嘅突破！
撰文：馮仁昭