【《MAMA》紅地毯】男團鬥人氣 李英愛 宋仲基壓軸登場
MAMAEXO李英愛BTSWanna One
韓國年度樂壇盛事《MAMA音樂頒獎禮》今年分三地舉行舉辦為期一星期嘅慶典活動,並先後上周六先喺越南舉行,前日就移師到日本舉行,今晚就壓軸喺香港亞博館舉行。頒獎禮之前一眾嘉賓先現身紅場地毯。
Super Junior出場後就到女團Red Velvet現身紅地毯,成員Joy谷胸示人,緊接就到韓劇《今生是第一次》嘅李清娥、李范秀、宣美、泰民、尹啟相等出場。
到臨近紅地毯尾聲環節,大勢男團BTS(防彈少年團)就進場,全場粉絲即時發出尖叫,成員RM以英文同大家打招呼,Suga就表示多得粉絲嘅愛,所以喺韓國、海外都咁受歡迎,多謝大家。韓片《逆權車伕》男星李帝勳表示鍾意SJ、尹啟相嘅女友李荷妮就同男友分開現身紅地毯,身材豐滿嘅李荷妮就收起性感,但亦有大方騷長腿現身。
人氣男團Wanna One到場,掀起高潮,佢哋仲鬼馬甫士,又大派心心冧港迷,姜丹尼爾晒英文打招呼,賴冠霖用國語表示參與晒一周三次《MAMA》好榮幸,而朴志訓就撒嬌做「儲存」及「我心裡,收藏」手勢。男團EXO到場,司儀輪住同成員傾偈,世勛晒普通話:「好久沒來這裡,我非常非常高興,你們開心嗎?今日我們非常非常開心地玩吧。」EXO小分隊ECO-CBX日前出席日本場,伯賢表示今日同成員一齊出席好開心。
46歲「大長今」李英愛噚日抵港時以全黑打扮示人,今日現身紅地毯,愛姐繼續以全黑打扮示人,隆重得來又好高貴,艷壓全場。愛姐話自《大長今》後首次喺咁大型舞台見大家,好開心及榮幸,好多受歡迎嘅歌手,好難揀特別鍾意一個,今晚就好似粉絲咁出席盛會,又指自己都鍾意K-Pop,包括男團EXO同BTS。
到壓軸登場、今晚擔任主持嘅宋仲基現身紅地毯時好鬼風騷,佢仲同兩邊嘅粉絲握手,非常親民。未知係唔係噚日抵港時有水腫關係搞到臉圓圓咁,今日佢行紅地毯時臉龐好似瘦咗少少。宋仲基表示5年後再出席《MAMA》,覺得好開心,會努力完成今晚主持嘅工作,被問到幾時再有新作,佢表示結婚無耐未揀好新作,會盡快以新作再見大家,又指今晚好期待EXO及BTS嘅舞台。
更多韓流,喺晒《娛果》
http://fb.com/appledailyent