曼聯「92班」訪港，吸引咗一大堆魔迷去追星，由機場追到港鐵，再去埋奧海城。如果得到偶像一句好似「辛苦晒你哋」咁嘅問候，仲唔冧爆粉絲？不過，菲臘尼維利似乎就衝錯出嚟，搞到球迷一頭霧水。

菲臘尼維利喺五小福中最識做，喺ig放咗張高炒拍低本地魔迷舉晒曼聯旗同頸巾嘅相，加句「Nice welcome in Hong Kong」想冧球迷，但原來張相出咗事，有好多人喺佢ig留言，指張相其實係曼聯2013年訪港時嘅舊照，根本唔係今日影嘅；有人就幫菲臘佬護航，話佢可能係想搞gag。

2013年訪港同傑志鬥波個隊，係曼聯，唔係曼聯元老隊，照道理菲臘佬唔會有呢張相，所以有理由相信係菲臘佬有ig公關，可能係班公關send錯相，先有咁嘅誤會。好好地學哥哥加利佬喺ig放今日啲咪好囉，起碼唔會鬧笑話。