1950至2002，五十二年間，香港最好嘅流行曲歌星，你話係邊個？50到70年，係英文歌世界，60年代披頭四熱潮觸發本地𡃁仔夾band熱潮，許冠傑主唱「蓮花」樂隊，陳任唱JoeChanandtheManners，重有TheMystics,TeddyRobinandthePlayboys；初出道嘅羅文都組成一隊RomanandtheFourSteps；後來又有TheWynners（譚詠麟、鍾鎮濤），卒之踏入70年代，最先跑出嘅就係許冠傑、羅文；許冠傑喺英華書院畢業，最有香港土生土長書院仔嘅味道，佢嘅歌寫盡市民心聲，與香港人共同呼吸，百分之一千係香港本土文化精華。《半斤八両》當年聽到笑中有淚，𠵱家聽就只得一個喊字，十月十八日晚英華書院校友搞「英華薈萃金曲夜」，許冠英代弟從軍唱《半斤八両》，校友梁錦松係主禮嘉賓，唔知佢有冇留意歌詞呢？
羅文有內地教育背景，唱歌自然流露出一股中國文人藝人嘅憂患憂怨意識，味道與許冠傑完全唔同，若純以唱功而論，羅文咬字純正、聲音圓厚、感情專注，可稱香港第一人，最難得嘅佢冇輕言退休或詐諦退休，一生以唱歌為事業，若天假以年，直情可以係法蘭仙納杜拉香港版，唱多三十年都掂，可惜啊，一代歌星已成歷史。