羊年下個星期就到,恒生銀行(011)一姐李慧敏每年都會率領執董馮孝忠等一班管理層,同佢哋個招牌財神一齊影張大合照同大家拜個早年,為咗增添年青與活力感,佢哋近年都會搵埋幾位大學畢業冇耐嘅見習生一齊影相,今年呢張,兩位女見習生仲特別省鏡。
聞說,恒生公關部同事每年都會喺公司內部不同活動,留意每位見習生,揀出比較活潑嘅同事去影呢張拜年相。今年兩位女見習生都係舊年七月加入恒生,分別叫Karen同Jasmine,兩位喺大學都係主修工商管理,𠵱家喺不同部門輪流工作,學習銀行營運。Jasmine今年四月仲會跟管理層去雲南山區做義工。