劉浩龍（師兄）噚晚喺北角一間舊式上海髮廊為新歌《阿龍理髮》拍攝MV，着住一身白袍化身老式理髮師嘅師兄話，今次新歌請到林海峰撰詞：「今次係一首勵志歌，以剪頭髮去鼓勵人，無論遇到咩事，就算失戀都好，剪個髮心情就會好番。」

師兄又表示，MV入面要親自操刀替飾演四位演員剪髮：「我係第一次幫人剪，頭先啱啱先學，我有同佢哋講唔使驚，現場有專業髮型師幫我執手尾。」除咗造型似，師兄話仲特登整咗個霓虹燈招牌配合MV。

講到舊式上海鋪，師兄話以前細個成日幫襯，仲曾經有一段慘痛經歷，佢話：「當時啱啱升中一開始貪靚，叫媽咪帶我去新式髮型屋，剪咗一個當時好興嘅「郭富城」頭，但返到屋企老竇好嬲，即刻帶我去上海鋪剪番個『鮑魚刷』頭。」佢話當時仲一路剪一路喊，自此就唔肯再去上海鋪剪頭髮。

精選娛聞，喺晒《娛果》
http://fb.com/appledailyent