肥媽(Maria Cordero) 同黑妹李麗霞，即將喺11月17、18號兩晚，於灣仔伊利沙伯體育館舉行《黑·媽媽笑住唱演唱會2017》。今日下午佢哋就喺西環出席演唱會記招，肥媽話本來舊年3月喺紅館開完演唱會後，就諗住退休，但有唔少Fans叫佢重出江湖，加埋同黑妹係好多年好友，兩個都覺得好多唔同類型地方嘅演出都做過，唯獨未做個棟篤笑，所以就有今次演唱會嘅構思，佢哋話今次演唱會係唱歌同棟篤笑各佔一半一半。

肥媽同黑妹接受訪問時話，近日已經密密為演出開會，黑妹話：「我哋去肥媽屋企開會一邊煮一邊食住開，肥媽仲要煮鮑魚。」肥媽就話：「喺屋企開會好啲，我哋開會講笑笑得好大聲，如果出去餐廳酒樓人哋會以為我哋傻㗎，喺屋企開會自在好多。」

兩人預告到時會有好多爛Gag笑話，所以開會期間兩個都已經笑唔停，仲透露演唱會導演錢國偉要求佢哋到時一定要帶住Earphones，就係怕佢哋喺台上講講吓Overrun都唔知。

問到肥媽到時係咪會大講有味笑話？佢話：「我唔會講粗口，唔會講性器官，係都係你哋諗歪咗，好似我話阿婆賽跑，你諗到咩咪咩囉。」又透露香港未演出已經有廣州站同佢哋接洽。