爵士特首寶座即將坐定，即時公布「強政勵治」頭炮：改革所謂行政會議，保留三司，將「十一局」頭目局長踢晒出會！
所謂行政會議人數，本來驟減至十一人，又另增四名，變成十五人，即時全面恢復英治舊制，廢董第二任內吹噓嘅三屍十一焗「高官問責制」，係一個泡沫式笑話，終於化為一陣烏煙嘞！
民建聯較早時，重想密謀進一步奪權，攝人擺棋，放聲氣話每個局長身邊，要設一名所謂「政治顧問」，企圖摻沙子、挖牆角，點知現時煲呔索性將十一局長全部清洗出行政會議，叫佢哋喺門口出面罰企，咁十一局重點樣一人整一個「政治顧問」法？不如食自己喇係咪？

禮聘肥彭回朝

民建聯奪權圖謀，俾煲呔一嘢就化解於無形！下一步，搵邊啲人入行政會議，各路反曾亂港勢力，包括民建聯、自由黨、民主黨，就梗係個個沖涼淨身，批尖個頭，再搽一浸油，諗住一二三爭櫈仔嘞！
不過，正如八方話過，又委任啲政黨人物入行會，咁又同廢董時期有何分別？政黨頭頭，個個計算自己係咪有辱冇榮，一話二十三條立法，見五十萬人大遊行，佢就至識走精面，第一個彈出玩辭職！放政黨頭目入會，冇民主黨人又唔掂，有呢，就冇晒行政主導，弊在又話以民為本，焗住整個工聯會阿頭，行政會議例如有得工聯會鄭耀棠，又要有李卓人平衡番Lu喎！
咁咪又係原地踏步得個桔？行會用咩人？《基本法》規定，九七後英國人可以留低做顧問！行政會議，係顧問機構，集體決策，最好梗係禮聘肥彭回朝，不過，就算中共肯，肥彭睬你都有味，不如退而求其次，實踐《基本法》內「任用英國人為顧問」條文，任用一啲二線英國人、同啲半英國人入會喇，例如︰一向反肥彭嘅鍾逸傑、後改為親中嘅列顯倫、李鵬老友羅德丞同埋李福善、黎敦義呀咁，或者去澳洲請番前保安司黎慶寧回巢，同埋《南華早報》前名記、嫁咗個「中國人」老公盧維思嘅番妮．黃（FannyWong）黃麗君呀咁，再加埋肥彭重用過嘅大細龜，另外為咗團結和諧，再禮聘埋陳方安生入會，做名譽召集人，嗱，呢個眾星拱月金裝豪華陣，就靚到絕，煲呔民望唔爆燈，八方就自拆招牌！

傳真︰2623-9278
電郵︰[email protected]