第五場蔡約翰贏完「輕彈錢笑」，第六場又贏另一大熱門「桃花心」，到了尾場更贏埋半冷的「川河首駒」，幫蔡約翰今年首次中三元。四歲馬「桃花心」今日久休復出跑1600米，用熟手技工韋達，結果13檔起步順利切入，就此一放而回，擊敗擂台躉「一哥」，取得跨季三連捷，兼今季未輸過。眾所周知，韋達今季顯著減少騎蔡廐馬，不過騎練合作卻保持水準，39戰獲6勝13位，合作上名率接近五成，而「桃花心」在四歲馬系列頭兩關都冇報名，反為尾關打吡榜上有名。贏埋呢場加到70幾分，想趕搭尾班車仍要繼續努力，至於「一哥」之前兩出兩勝，今次增程初跑1600米，終被打破不敗之身。