今日喺陳美詩（Macy）35歲生日，身為男友嘅孫耀威當然要有所表示啦！老孫噚晚就夾埋成班老友搞咗個Surprise生日P俾Macy。老孫將Macy帶到酒店房，只見Macy一開門，成班Friends就即時拉紙炮兼唱生日歌，令毫無準備嘅Macy既驚喜又感動，而係身邊嘅老孫都好識做，即時好gentleman咁幫女友拎住個手袋，等Macy可以有手抹走因為感動而流下嘅眼淚。

唱完生日歌之後，Macy班friends都勁興奮咁話:「係咪估唔到？你知唔知俾surprise你係好難架！我哋要諗好多嘢o架！」

當晚老孫準備咗個巨型香蕉形嘅蛋糕俾Macy，係咪有咩暗示就唔知喇，但據老孫個品嚐包膠寫呢，個巨蕉蛋糕好好味。而事後（即係今日）老孫就upload咗張同Macy肉緊咀咀相上ig，佢留言話：「Surprise生日PARTY大成功！謝謝各方好友極力配合！祝陳美詩生日快樂！祝大家元宵節快樂！」不過唔知係咪怕俾人問佢有咪趁機求婚，所以老孫一早已經用一堆hashtag答大家：「#記者朋友們不用問」「#並沒有當眾求婚環節」

而Macy今日傍晚亦喺微博表示:「過了人生第一個驚喜生日party!你們真的把我騙得透透了！哈哈！很感恩有這麼愛我的好朋友們，謝謝你們的愛和精心的安排。今年生日剛好也是元宵節，在這裡祝所有人都幸福快樂！」