戶田和幸喺禮拜一終於成為熱刺球員，雖然好多人冇乜睇好呢個日本球員，但我求大俠就唔係咁睇，覺得佢發展空間會幾大。
好多人都認為熱刺今次借用戶田，純粹為咗賺日本人錢，事關佢哋除咗可以將比賽賣畀日本電視台之外，重可以吸引好多日本遊客嚟佢哋嘅球場睇波同觀光。計落條數，喺未來一年賺嘅錢，肯定可以cover到畀清水脈搏嗰三十萬美金，重分分鐘多賺幾倍㖭。
但熱刺領隊荷杜銳意將隊波年輕化，重話唔會用舒活同科特呢兩位年過三十嘅防守中場，所以戶田話唔埋好似喺帕爾馬同飛燕諾搵食嘅中田英壽同埋小野伸二咁，成為自己隊波嘅主力成員。
戶田今次加盟熱刺，最開心肯定係富咸嘅稻本潤一，事關有個同鄉嚟陪佢，可以冇咁悶。但同熱刺一樣位於倫敦嘅富咸就慘嘞，無端多隊波同佢哋爭遊客生意。

彭拿治夠晒大想頭
俾阿仙奴借到屈福特嘅「神童」彭拿治，喺隊波打得幾好，重周不時俾人讚，而唔知係咪呢個原因，搞到佢心雄咗，竟同阿仙奴領隊雲格講如果第日返阿仙奴冇正選打，就會走人。阿仙奴隊波人才濟濟，連韋托特、龍格保同簡奴都唔一定喺正選。當年十五歲以一百萬鎊加盟，但𠵱家連英格蘭腳都未係嘅彭拿治，竟然有咁大想頭，簡直就係癡人說夢話。