睇世界盃頭一圈賽事,三十二支隊伍全部生猛亮相,平時睇慣歐洲波的觀眾,對非洲球隊烏蛇蛇,四年一度,機會難逢,認識足球新紮阿哥,凡自命有國際視野的球迷,和有信心將香港打造成國際都會的高官,沒理由錯過這個偷師刮料的廉價「平台」,往返德國的機票慳返,捱吓眼瞓濕濕碎。
不過講波佬(今年加插講波婆)唔係咁睇,慣性一面倒捧強隊,初哥隊伍,變成他們插科打諢嘲諷的對象,非常刻薄。非洲球隊確是冷腳,隊中鮮有熟口熟面人物,評論員懶得就懶,功課唔做,資料唔齊,與其聽他們為強隊贈興打氣,當弱隊無到,不如將volume扭到只剩球證吹雞的嘴形,球員豐富的身體語言令近乎默片的直播更精采,半夜十二點半的客廳也安寧得多。