今日港交所（388）公告特別多，單單由早上6點至晚上6點，12個鐘已有256條通告，拍得住業績高峰期，睇到華華眼都花，但細睇下，原來當中有足足225條（即係88%）嘅內容都係一樣，係唔係spam嚟架？

通告內容話：「自2019年7月11日起，本公司的香港股份過戶登記分處卓佳證券/登捷時有限公司（香港股份過戶登記分處）之地址將由香港皇后大道東183號合和中心22樓更改為：香港皇后大道東183號合和中心54樓。香港股份過戶登記分處所有電話及傳真號碼將維持不變。」

原來本港主要股份過戶登記處之一的卓佳（Tricor）改地址，本周起將總部搬咗去東九龍，但為咗方便小股東，辦股票手續繼續唔使兩頭走，加上考慮到股民多年來都慣咗喺合和處理股份過戶事宜，所以集團特登繼續喺合和續租一層，由22樓搬上54樓，作為股份過戶登記分處及其客戶的通訊地址。

由於地址同之前有分別，都要出通告講返，咪睇到啲股民眼都花囉！

咁點解要由22樓搬上54樓呢？華華聽講，卓佳考慮到22樓嘅過戶登記櫃檯已使用多年，所以決定要重新裝修，希望帶畀股民更好嘅服務體驗，同提升集團形象，但又考慮到若果喺同層裝修，期間又會影響服務，所以最終決定搬上54樓，目前裝修中，7月11日正式啟用，到時股民唔好去錯啦！