以指數表現計，近期中港股跑輸美股，通常美國會向中國更大力施壓。

外電周五報道，特朗普有意將美國上市中概股除牌，又希望限制美國退休基金投資中國，討論仲係初步階段。配合早兩個月有內銀拒絕有關違反北韓制裁令嘅傳召，最嚴重後果係禁止進入美國金融系統，加上中國被定義為滙率操縱國後「守行為」一年，而家剩返大半年，最嚴重後果係禁止中國獲得美國私人資金。

換言之，貿易戰過後，美國近幾個月係為資本戰作部署。美國係真打資本戰定虛張聲勢？都係視乎壞消息對美股壓力而定，呢個亦係未來一年嘅股市主題之一。剩係計中概股除牌威脅，就令騰訊ADR跑輸下跌超過2%。

過去恒指以24,500點至25,000點作為支持位，美國真打資本戰嘅話，港股會唔會因應新一輪壞消息而令將上落範圍下移一格？要注意嘅係，同貿易戰唔同，資本戰主要影響反映喺股市供求，對中國實體經濟影響不及貿易戰來得直接。於資本戰風聲之下，美資會提早逐步減持中資股避險，唔會咁戆居等到一年半載後先沽。

不過，一旦少咗美國資金投資中國，令估值更便宜，其後亦可能引嚟其他資金低吸中國股票，中國愛國資金更可能出手接貨，一場資本拉鋸戰，似係為未來一年港股製造波幅多過大型跌幅，不過越多美資持有嘅中國股票，可能越不利。

晉佳