韓國女團A Pink早前遭男粉絲死亡威脅，當中男粉絲威脅話要用刀捅死A Pink成員，警方得知情況後更安派警員護送A Pink返屋企。

而A Pink嘅孫娜恩同初瓏早前就擔任JTBC節目《非首腦會談》嘅嘉賓，節目已於噚日播出。當中喺節目中，被問到有冇遇過一啲瘋狂粉絲做出過激行為時，初瓏就指到海外工作時，海外粉絲會打電話致電到酒店房間搵偶像，又會喺凌晨時候按房間門鐘或敲門，初瓏話：「個男粉絲用iPad遮住個樣，因為晚上我哋會着睡衣，打算我哋一開門佢就可以用iPad拍照。」初瓏指遇到呢啲情況佢哋會選擇唔出聲，之後靜靜雞通知經理人。而孫娜恩就話：「我曾經聽過有粉絲會喺送嘅禮物裡面裝置偷聽器同埋針孔鏡頭。」

另外，提到鍾意邊位偶像時，孫娜恩就話自己係BoA迷，第一次買嘅CD就係BoA嘅碟。而初瓏亦喺節目中自爆係Rain粉絲，自己曾經因為有機會同佢握手而差啲喊咗出嚟，不過提到會唔會討厭Rain嘅老婆金泰希時，初瓏就強調唔會，仲話當初Rain宣佈婚訊時雖然感到有點難過，但同時亦真心戥佢哋開心。