記得早前8月中利物浦對車路士前夕,謝拉特都係有傷在身,搞到領隊賓尼廸斯要幫佢打止痛針先可以出戰車仔。今次麥卡倫有樣學樣,不過臨打針之前賓帥出嚟阻止話:「你唔可以咁樣對我嘅球員!」麥卡倫理直氣壯咁回應:「先前你都係咁對謝拉特啦,家陣國家隊有難,做得國腳點可以縮沙?」
我求大俠聽完都唔知幫邊個好,正所謂話晒利物浦先係謝拉特嘅米飯班主,出得糧畀你,要你點就點。咁先叫做天地有正氣,你估謝拉特真係謝老四?不過話分兩頭,假如我求大俠咁勁可以入選到英格蘭大軍,我就乜都唔理,話晒代表國家隊比賽係無上光榮嘅事,打針咪打囉,打手臂咋嘛,又唔係打屁股?呢單打針事件相信有排拗,周六球迷就睇吓謝拉特得罪邊位領隊?