自從阿倫（Ray Allen）喺2012年轉開塞爾特人兼轉投熱火後，當時綠軍球員都好似同佢反咗面咁，「三巨頭」嘅皮雅斯（Paul Pierce）同加尼特（Kevin Garnett）早前話要喺2018年慶典佢哋奪冠10周年，都冇諗住預埋阿倫。

不過，近日到上海參與「超級企鵝籃球名人賽」嘅皮雅斯，竟然喺ig上載自己同阿倫嘅合照，仲話係時候重修舊好，仲tag埋加尼特同朗度（Rajon Rondo）話：「無論發生乜事都好，我哋之間都有特別嘅聯繫。」仲話一日係塞爾特人，就一世都係塞爾特人。