新世界發展(017)主席鄭家純今年初中風，出院後一直在家養病，傳媒每次見到佢大仔鄭志剛(Adrian)，都要問候純官。Adrian早兩個月講過，純官健康非常好，估計可以出席集團下次業績會。嗱，同系新創建(659)同新世界發展就將於明日同周四召開業績會，究竟純官會唔會現身呢?

消息人士透露，純官康復進度良好，精神唔錯，頭腦仲係好清晰，講到說話亦行到，可能只係慢少少。如果佢老人家心情靚，出席業績會都不出為奇。不過，純官一向係傳媒甜心，有問必答，答到大家冇問題為止，純官亦可能想以最佳狀態示人，總之就係心大心細喇。

純官呢次病倒，保密功夫的確厲害，照計佢都要出出入入去醫院覆診，間唔中都有出下街，但冇乜人影到佢病容，搞到大家真係幾掛住佢。又好在佢一早準備交棒，第三代嘅Adrian喺集團工作超過10年，基本上有自己班底同發展理念，市場對呢位接班人開始受落，純官可以安心養病。

講開又講，Adrian早兩個月喺周大福（1929）股東會估計純官可以出席業績會，話唔定，佢係講緊周大福11月嘅中期業績會!

蘋果財經，關心你飯碗
http://fb.com/appledailyatm