近年大小類型嘅全民運動如馬拉松賽事為唔少企業、機構大賣廣告，香港賽馬會都唔執輸，嚟緊打算藉住其慈善版圖，搞全民運動。馬會一眾高層今日趁立春同傳媒新春午宴，慈善及社區事執行總監張亮席間宣佈，未來嘅慈善業務策略發展會集中喺青年、長者同運動三方面，其中會多辦全民運動，同以往焦點放喺精英運動有別。

本身係「全城街馬」創辦人嘅張亮話，若小朋友自細有運動習慣，大個都會繼續做運動，社會成本都會少啲，嚟緊馬會會同唔同嘅非牟利機構合辦全民運動。馬會行政總裁應家柏話，據一份英國財經報章同阿姆斯特丹自由大學合作制訂嘅世界慈善指數，了解全球邊個機構、基金捐錢做慈善最勁，賽馬會去年位列第六，單係2014/15年度嘅慈善捐款就達38.7億元，排首位則係BillGates搞嘅基金。