當日王菀之喺facebook講咗句﹕「我討厭政治」，招來陶傑痛批，不少網民亦批評Ivana，指出即使你唔關心政治，但你生活上每一樣嘢，衣食住行，樣樣都係政治。領匯霸權，係政治；小巴加價，係政治；一式一樣的大商場趕絕小店，都係政治。生活，根本就離不開政治。

今日愛港力嘅陳淨心率領一眾成員浩浩蕩蕩上港台，話力撐廣播處處長鄧忍光。而同時間，鍾嘉欣、連詩雅及亞洲之子亢帥克於灣仔出席港台職安活動，不約而同被問到﹕如果港台被消毒，你哋接受港台訪問時，係咪都要避開唔講敏感詞？

回應如下﹕
連詩雅﹕ 「有啲話題係關於政治嘅問題，自己都唔會太大嘅評論，因為自己畢竟都仲係一個小市民。可能有啲意見我都會擺喺心，唔講出嚟，所以平時都好少討論政治問題。」
「有啲嘢自己控制唔到嘅時候，不斷去自己去討論嘅時候，都唔會改變到啲乜嘢。」

鍾嘉欣﹕ 「因為我係一個好細膽嘅人，所以好安全嘅人。自己一啲都唔清楚依家發生緊咩事。我不嬲都希望，乜嘢工作、乜嘢工作單位都好，大家都和諧和諧。」

亢帥克﹕ 「冇留意呢方面嘅事，政治方面嘅事，好少留意。我唔係好鍾意政治，自己都……同埋都冇乜留意政治。始終係政府嘅台，就避免敏感嘅說話啦。」