中美貿易談判大家繼續睇淡，連林鄭都講出口話談判唔樂觀，美國亦取消劉鶴訪美前準備會議，市場都幾大程度預期中美傾唔成有用嘅協議。港股喺咁嘅情況下都唔跌，人民幣喺放晒水嘅情況下亦都唔跌，風險胃納升溫。與其等2月底前後睇定形勢先，早啲買入心水好股博佢lead得住，似乎冇壞。連adidas CEO Kasper Rørsted都講到，2019年中國、美國經濟very strong，行業龍頭咁樂觀，李寧（2331）、特步（1368）係咪有運行，前者長線圖表呈圓底，業務走出谷底，buy and hold係好選擇。

上期講到飛機租賃行業同中銀航空租賃（2588）。一般嚟講，飛機租賃合約長達12年，消耗一架飛機大部份嘅青春（剩餘約13年價值一般只佔15%），飛機租賃企業買飛機時，已同客戶簽定租金等條款，只要航空公司唔執笠，12年租金理論上袋袋平安。盈利可測性咁高，於是唔少飛機租賃公司以槓桿去做呢盤生意，其中，中銀航空租賃嘅槓桿大約2至3倍，可接受，不太高亦不過份保守。以飛機租賃行業長期年回報率6%左右計算，中銀航空一單生意嘅槓桿後年回報可以有10%以上（扣除利息成本後）。

利息高低成為關鍵因素，中銀航空本身係新加坡公司，2006年畀中行（3988）收購，正正利用母公司嘅融資優勢。近期美國暫停加息呼聲高唱入雲，對中銀航空租賃有利。

中銀航空租賃其餘風險因素係航空公司執笠、經濟長期低迷打擊長遠航空業需求同埋關稅等等。中銀航空喺2015年底十大客戶冇一間係大陸航空公司，當時最大客係佔7.2%收入嘅國泰（293），就當佢近年海航生意增加，估計比例都唔算多。平均剩餘租期8.3年，鎖定得多收入，未來盈利可測性高，講緊呢隻股得10倍PE唔夠，難怪舊年連領展（823）都跑得贏了。

晉佳

https://www.facebook.com/advanceguy1