【操盤手札記】黃色經濟輸贏股（割柑人）
蘋果日報 2019/12/30 18:00
割柑人操盤手札記黃色經濟圈
陸陸雞煲店店東黃先生。
難捱嘅2019年已到盡頭，所謂「年年難過年年過，事事無成事事成」，大環境嚟睇，中美貿談、英國脫歐，捱到年尾都有所成；但小環境嚟睇，香港政經無成，政府濫權、警察濫暴仍然持續，抗爭運動勢將延續。
除夕前夕，港股喺期指結算日再升0.3%，收28,319。恒指一度觸及上升通道頂28,400水平，展望後市，短線唔排除整固，皆因由上年1月歷史高位33,484，同今年4月高位30,280延伸嘅下降軌，剛好處於附近成阻力位，250天線27,500水平則成支持位。
6月至今嘅反送中運動，孕育出「黃色經濟圈」。繼施永青月初唱淡後，屈穎妍、梁美芬、陳健波、邱騰華、《環球時報》、《大公報》等亦口誅筆伐，總括而言，就係鬧爆黃色經濟圈注定失敗。既然係咁廢，咪由得佢囉，點解咁㷫？
黃色經濟圈原意係畀支持運動嘅商戶不致因社會動盪而結業，同時杯葛為政治經濟利益而支持政府嘅商戶。究竟個圈有幾大？以區選294萬人投票，黃藍六四比計，即有176萬人；再按政府統計數據，每人每月平均開支9,253元，假設半數用於飲食消費計，即每年有977億元。
千億市場，唔係嘢小！咁點做先會贏？關鍵係競爭力，要令自己利潤高過對手。就好似喺中美貿易戰，特朗普令美國人少買中國貨，亦令中國人多買美國貨。咁點界定黃店？事實上，市面出現唔少偽黃；而且若只嚴限龍門冰室、陸陸雞煲呢類深黃，個圈嘅生態會大縮。
港股之中，有無黃色經濟圈贏家輸家？先講贏家，計有大快活（052）、壹傳媒（282）、香港電視（1137）、毛記葵涌（1716）等；至於輸家，港鐵（066）、國泰（293）、TVB（511）走唔甩。不過股市搵食，要分黃藍紅嘅話，就無乜好炒。