【新增影片及發展商回應】

會德豐(020)將軍澳Savannah是區內第3個入伙盤，承建商有別於對上兩個樓盤，其中近期同系同區Capri個別單位更驚現50分，資深驗樓師詹濟南「詹sir」驗收第一個單位，結果15個項工種，13項都要扣分，地板及來去水不合格，總分75分，詹sir坦言，肯定好過Capri！

會德豐將軍澳南有4個樓盤，3個樓盤承建商均是金門營造，今次驗收的Savannah寧舍不同，委聘新世界(017)旗下協興建築。詹濟南驗收單位，實用681方呎，3房間隔，業主花約850萬元買入。未入單位，大門門框蓋都未裝穩，打開大門，門框見崩花，第一印象已嚇人。先入廚房，防煙門門頂牆磚欠掃口，轉身望窗，窗頂天花冚斜要重裝。驗廚房最重要睇水，踎底開櫃，熱水器去水喉欠氣咀蓋，「不過呢度水唔多，又唔會搞到漏水，但配件無左就無左。」鋅盆裝滿水，未放水就見盆底杯邊漏水，「浸滿水，壓力壓到杯底滴水。呢個係手工問題，駁位駁得唔靚。今次扣分多，但唔難整。」

客廳牆身批盪兩處空心，面積約3平方厘米，未達扣分標準，不過詹sir認為：「細細撻無乜大影響，到剝落起碼10年，根本唔建議剷底重造，但搵咗出來，最好申報。過往試過樓上裝修，個撻空心批盪變大。而家指出來，被人累都可以追討。」邊走邊驗，全屋地板多處鬆動，他認為，除了手工，還因為用料，「以往用實木地板，而家較常用軟地皮，加上底板薄咗。」

廚房漏水，廁所就無漏。不過浴缸邊防水膠邊輕微「披口」，詹sir稱：「任何披口都唔得，唧膠應該唧到密密實實，如果是靠近牆身浴缸防水膠邊披口，水會落浴缸底，水儲浴缸底，滲到隔籬唔奇，滲到下層唔奇。」

全屋15項交樓工種，僅批盪及地台無扣分，其餘13項工種都要扣，扣得最多是地板及來去水，扣到不合格，另外露台亦較低分，因為欄杆「走雞」漏防水膠，必須填補，否則框內儲水加速生銹。加上兩個房間窗戶又出現漏風，再扣瑕疵分，拖累總分75分。

詹sir坦言，今個單位是該盤第一個驗收的單位，屬於「良」，為可接受水平，亦維持該發展商一貫交樓水平，肯定好過同區新近入伙盤Capri，該盤分數由50至75分，至於較早年交樓的The Parkside分數由70至80分，當中5至10%更獲90分以上。

就有關驗收向會德豐查詢，發展商指「有關上述單位之執修事宜，已收到業主提交的執修列表，公司會安排承建商依據既定執修程序進行，詳情再另行通知業主。」

記者：陳家雄

蘋果財經，關心你飯碗
http://fb.com/appledailyatm