名牌生意唔好，去年10月LVMH旗下品牌MarcJacobs，就棄租尖沙嘴廣東道海港城的巨舖。當時海港城業主九倉（004）就話，該舖頭已獲另一個大品牌承租，但就未透露得詳情。近日呢個謎底終於揭盅喇，新舖原來係早排話要賣平價手袋自救嘅Prada（1913）...嘅副線品牌MiuMiu，據悉呢間新店會喺本月底開幕。MiuMiu唔係上星期先加入名牌減價清貨的行列咩？仲開舖咁好景？

據海港城現時另一MiuMiu分店的員工透露，新店將會喺本月28號開幕，至於同區嘅兩間分店亦會保留。不過咁，Prada集團上月初公佈業績時先話，港澳區旅客消費及人數齊齊下跌、比其他地區「遭受更嚴重打擊」，暫時都睇唔到有改善跡象。而家喺巿道未見好轉情況下，再為副線MiuMiu開大舖，難道係睇好後巿？聽住先啦。

掌握財經生活資訊，即Like「蘋果ATM」fb專頁啦！
http://fb.com/appledailyatm