一年一度Hong Kong Sevens開鑼，贊助商滙豐噚日率先舉行社區同樂日推廣欖球比賽，香港區行政總裁施穎茵（Diana Cesar）當然要出席支持，同場仲有滙豐副主席王冬勝、政務司司長張建宗，同埋啱啱上任嘅東華三院主席王賢誌，當大家以為佢哋會上場表演，咦，個個都business attire，返工咁款喎，難道出席活動後要趕去開會？
冇欖球玩唔緊要，Diana就代表滙豐送個本地藝術家辛朝殷手繪嘅欖球紀念品畀張建宗。身形嬌滴滴嘅Diana好誠實咁話，自己冇玩開欖球。不過喺滙豐耐咗，對欖球認識深啲，就發現欖球都唔係想像中咁physical，仲好講究團隊精神。佢話自己雖然冇玩，但單單睇吓學吓都覺得可以應用落企業團隊度，獲益良多咁話。