康文署下面喺尖嘴有個香港藝術館，每兩年都會搞一場雙年藝術展，又係嗰種官辦文化活動，搞咗同唔搞都冇分別，因無論係香港或者係呢個世界，係好少人知道香港有個雙年展，今次雙年展又係無聲無息咁開幕，無法啦，遇上世貿會議同埋政改攻防戰，搵鬼報道啦。
阿怪士都去咗開幕禮，肥佬何又喺度表演九唔搭八演講大法，無喇喇喺開幕禮度叫啲藝術家同貴賓，支持香港政改，怪士一路聽重以為有人表演緊行為藝術，扮阿肥何講嘢，講到似層層，原來真係肥何喺度真人表演，喺個藝術展覽度叫人支持政改真係無厘頭，講衰啲，就係肥何叫啲藝術家醒目啲，要捧政府場，遲啲政府會做嘢㗎。

已經俾內地超前

呢個幾百萬推出來嘅雙年展，搞咗幾十年，愈搞愈衰，人哋廣州同上海雙年展同三年展都好有聲有色，國際傳媒又有好多報道，咪以為祖國唔支持前衞藝術，呢幾年唔知搞到幾厲害，係香港重以為自己好醒，嚟嚟去去咪係啲明星八卦嘢囉，人人聽到藝術都怕怕。肥何呢排都無乜鬥志，都係時候做番睇眼佬，肥何做咗局長之後真係愈來愈肥，嗰日喺雙年展開幕，見佢又肥咗，成條頸部唔見咗，遲啲做瘦身代言人一定掂。
怪士彈還彈，怪士都會叫朋友去睇吓呢個雙年展，有好嘢睇，香港係有啲掂嘅藝術家㗎，係政府唔識點推廣之嘛。嗰日肥何都冇乜心機睇，行吓行吓就走人，如果冇啲識藝術同埋有藝術承擔嘅人做藝術官，官辦藝術都好難有生路行。
文化怪士

傳真︰2623-9278
電郵︰[email protected]