43歲靚媽郭羡妮（Sonija）、向海嵐、陳爽等今日喺圓方出席護膚品牌活動，見Sonija一身古銅色，原來喺暑假同老公朱少杰、5歲大嘅囡囡Kylie、媽咪先去泰國布吉玩7日，再飛去溫哥華度假，佢笑指玩到好攰。曾揚言想追番個B仔，Sonija話：「冇消息，可能太緊張，0依家都唔諗咁多，做番自己嘅工作。」

Sonija表示呢個月幫囡囡搵小學，佢話：「上網好似shopping，搵咗大約10間，先申請本地學校，我好希望佢入到我母校，如果唔得，先再搵直資同國際學校。」日前Sonija喺微博上咗童年相，佢話：「囡囡都覺得自己好似我，將來選港姐？個個都係咁講，但讀好啲書先，佢都好鍾意表演。」

陳爽透露早前一家人去北京參與朋友婚禮，此行令佢攰到如殭屍一樣，佢話：「4日3夜，加埋瞓唔夠10個鐘，老公都有幫手照顧，但喺婚禮上佢飲大咗，我好似照顧3個小朋友咁。」陳爽又指將今次此行所有相剪輯成一條片作紀念。

下月2日係向海嵐43歲生日，佢話未諗到點慶祝，或者會搵女性朋友去旅行。異性朋友呢？佢表示：「冇呀，好失敗，我都想拍拖，但緣份好難講，遇到啱先考慮。」有咩擇偶條件？佢話：「錫我同我屋企人，鍾意小動物。」