眨吓眼又一年，領匯今日終於成功掛牌。呢壇嘢間接促成董先生腳痛，玉成曾煲呔着黃袍，令到特區天翻地覆。今日各位小股東賺餐晏仔去飲茶，應該大把口水噴；前後十二個月，呢個城市真係變化好大。
八方聽聞，今朝九點半個上市儀式，會由近排比較低調嘅唐唐司長主持。佢今年一早成立工作小組，捉住馬局長孫局長，昅實梁展文蘇慶和，又責成證監督住班保薦人，終於冇阿婆阿公出嚟，招股順利，超額認購，好值得飲番杯。
不過，按慣例朝早上市係開香檳，到夜晚慶功宴，如果司長畀面就可以去飲紅酒。領匯嘅經驗，對日後政府私有其他資產好有用。
除咗慶祝領匯順利上市，幫房委會套現兩三百億、幫小股民賺千幾蚊之外（凡申請認購三手千五股以下者都中籤，昨日暗盤價十皮八，大約每股賺一蚊），唐司長今日重有另一個好消息公布，就係香港經濟增長好勁，連埋領匯，真係雙喜臨門！

扶貧要最畀心機

政府原本預測全年經濟增長率係百分之四點五至五點五，第一、二季，拉勻有百分之六點五。今日公布第三季數據，八方聽聞都好理想，甚至有可能修訂全年增長預測㖭。總之係一個飲得杯落嘅幅度啦。但有人話最近個樓市有啲弱，班炒家未必頂得住，咁第四季有可能爆一個小小煲；所以保守啲計，都未必好調高全年預測。
呢兩場之外，唐唐中午重會去開扶貧會議，咁佢其實最應該放心機在扶貧工作，事關股民賺唔賺錢自己負責，經濟有增長亦係大財團得益先。
唐唐成日俾人話係公子出身不解民困，咁咪搞多啲扶貧，講少啲飲紅酒去度假囉。搞好啲自己個形象，話唔定第日又有件黃袍飛落嚟呢！

傳真︰2623-9278
電郵︰[email protected]