當年今日
關於我們

【皮膚敏感】去完越南得到一對「青檸手」 謝安琪遍尋解救良方

蘋果日報 2018/06/04 13:20

謝安琪越南青檸手

【新增回應】
乜嘢叫「青檸手」?謝安琪(Kay)喺社交網自爆去完越南之後,竟然得到一對「青檸手」,向網民尋求解決方法,Kay寫道:「去越南度假回來,得到青檸手一對,請問有冇人有解救良方?萬分感激!」
網民紛紛叫Kay快啲睇醫生,有網民搞笑留言:「我覺得你個青檸嘴可愛d」、「青檸水唔知得唔得」,亦有網民提議Kay做laser,甚至有過來人安慰:「冇事嘅,兩三個月後就冇事㗎啦,我都經歷過。」
有網民提議:「含柑橘類植物及含Vitamin C產品感光強,(唔見得光)laser最快, 加臨瞓用rose hip oil當hand cream 用。」Kay回覆:「 Thank u for your advice. I’ll try that for sure.」
好鍾意越南嘅Kay,前年去過當地旅遊,喺社交網貼相並留言:「南南真的好喜歡越南」但今次卻帶埋一對「青檸手」返嚟!曾經有網友去完越南,返港後發現手背長出黑斑,情況越嚟越嚴重,原因眾說紛紜,有人指因為掂完檸檬汁再曬太陽,有人話可能係皮膚敏感,甚至有人估係受到感染。
《蘋果》向皮膚科醫生史泰祖了解「青檸手」,佢在電話表示:「有病人去完東南亞返嚟,佢哋隻手曾經掂過水果,最常見係青檸液體,平時唔會有事,香港都有青檸,但因為外國地方比較曬,青檸汁同其他食物汁液會形成光敏感產生化學作用,令到手對紫外光特別敏感,滴到汁液地方有一點點,呢啲係幾常見嘅皮膚問題。」
史醫生表示喺醫學上唔係叫「青檸手」:「呢啲叫做對紫外光敏感,由化學物質導致陽光敏感。」問到有乜解救方法?史醫生話:「染咗冇嘢可以解救,一般等佢慢慢消退,可能好多個星期或至一個月;或者搽吓去斑膏,或用激光去斑,不過唔建議搞咁多嘢,但如果急性階段又紅又有水泡等嚴重反應,當然要睇醫生或者要搽類固醇藥膏。」
精選娛聞,喺晒《娛果》
http://fb.com/appledailyent
empty
(Kay facebook截圖)
empty
Kay前年都去過越南旅行(網上圖片)
empty
Kay在網上出po求救「青檸手」良方(網上圖片)
empty
(Kay facebook截圖)