近日政商界官場熱話，咪以為係林鄭治下任何一項政策，一地兩檢要硬過關？大家都似乎話之你，紛紛花時間去研究某女高官嘅一襲奇裝。商務及經濟發展局常任秘書長利敏貞周二、即係大年初五出席記者招待會嘅紅綠「鳳袍」，令人「目不暇給」，陪佢一齊出席記招嘅商經局局長邱騰華不單唔介意被搶fo，噚日仲以十字真言大讚呢位焦點下屬！

稱開工着靚衫係「恰如其份」

唔少人都話，利敏貞嘅鳳袍似清裝好難carry，難得年約52歲嘅利敏貞卻着出獨有嘅自信，鋒芒畢露，將隔籬嘅邱騰華比下去。八方噚日喺鄉議局團拜問過邱騰華，見到利敏貞盛裝赴會時，有冇「眼前一亮」？佢話喎，新年後嘅首個工作天，利敏貞一身華服係「恰如其份」，而且佢專責創意產業，自然有啲fashion sense，完全唔覺有問題。
事實上呢，利敏貞亦令更多人留意當日記招內容，邱騰華仲大讚利敏貞講嘢好有point，但就冇講明，係咪特別想講利敏貞寸爆無綫嗰部份？但就吐出十字真言，總結利敏貞嘅矚目登場：「着衫有亮點，講嘢有重點！」嘩，瞓身力撐下屬，唔少網民大讚邱騰華係好波士！


李八方