韓國型男鄭雨盛今日以一身藍色西裝喺中環出席護膚品活動，佢透過繙譯表示今日來港只係留一日，覺得好可惜，因為冇機會四圍去，佢話：「我同好多韓國演員都一樣，都好鍾意香港，對香港有好特別嘅感情，因為大家都係睇香港電影長大嘅。」問到今次行程咁趕，有冇時間見吓佢朋友、榮升父親嘅黎明（新聞連結： https://bit.ly/2CnBbL0 ）？鄭雨盛話：「都係好可惜，冇時間。」咁有冇趁機恭喜黎明生女？鄭雨盛諗咗一大輪後答：「嗯…我都係唔清楚。」

鄭雨盛又透露自己近日喺首爾拍緊新電影，稍後會移師到釜山繼續拍，預計會喺明年農曆年左右就會拍完，並將會喺韓國上映。佢話自己今次會飾演一位律師，喺佢調查案件時認識一位少女，對佢哋生命有啲影響咁，不過佢就話要賣關子，唔可以再講更多電影細節。

另外，問佢有咩護膚心得，鄭雨盛話：「男士通常都唔會用太多護膚品，最緊要揀一啲適合自己嘅就可以，同埋要配合運動。」問到佢鍾意做啲乜嘢運動？鄭雨盛話：「都係做啲帶氧運動，例如跑步。」被問到佢落街跑步會唔會引到啲女fans追住佢，鄭雨盛笑言：「就係因為咁所以要跑快啲，呢個就係鍛煉。」

精選娛聞，喺晒《娛果》
http://fb.com/appledailyent