當年今日

三人同遊東南亞返港
馮仁昭四圍超:哥哥唐唐新歡齊黑面

蘋果日報 2002/04/05 08:00


早前有報道指張國榮(哥哥)因為喺內地籌拍新片《偷心》,以致同好友唐鶴德(唐唐)分隔兩地,感情現危機。而哥哥新聘嘅助手Kenneth,更被指為哥哥同唐唐之間嘅第三者,三人更未試過同場出現。
然而,前晚哥哥、唐唐同Kenneth竟然一齊從外地返港,粉碎咗唐唐同Kenneth不和嘅傳言。
前晚七點幾,Kenneth推住行李先行步出機場,唐唐同哥哥則殿後。當哥哥見到記者時,即時面黑黑,記者問佢由邊度返嚟時,哥哥一概拒絕回應,並急步同唐唐及Kenneth離開。就記者所見,相信佢哋係由東南亞旅行返港。

康子妮否認緋聞
此外,康子妮同鄧浩光噚日亦出現機場,佢哋準備去印尼拍旅遊特輯。康子妮對於佢同林曉峰(阿Lo)嘅緋聞,及有傳因為佢嘅介入,令阿Lo同女友分手之事,康子妮話:「我哋冇拍拖,但係好好朋友,咁樣講唔係幾好,因為阿Lo啱啱同女友散咗。」

朱慧珊獲贊助30萬鑽飾
朱慧珊同黎淑賢噚日去咗亞視,出席新遊戲節目《群雄奪寶》宣傳活動。主持人朱慧珊佩戴咗Tiffany贊助、價值三十萬嘅鑽石耳環、戒指同襟針。
朱慧珊話:「做呢個節目都有壓力,但會盡量做好。」節目嘉賓黎淑賢就話:「𠵱家我多咗工作,有收入心情都好啲,唔使『打斧頭』。」

焦媛同高志森劃清界線
焦媛噚日以電視劇《伴我同行》女主角嘅身分,到亞視總台出席支持「西藏殘聯」善款移交儀式。焦媛噚日代表亞視將有關嘅善款支票進行移交,佢話:「我最近簽咗新經理人公司,係演藝事務所有限公司。」問焦媛係咪想劃清同高志森嘅工作關係,佢話:「都可以咁樣講嘅。」
奀妹返台灣探媽咪
傅天穎(奀妹)噚日出現機場,原來佢返台灣探媽咪。早前台灣發生六點八級地震,奀妹專登返去睇媽咪。佢話:「屋企影響唔大,只係有啲嘢跌咗落嚟。近日我感冒又胃痛,我想返台灣睇醫生,順便休息一個禮拜。」

家燕被評慈母感搞笑
日「麥兜仔」李晉緯,接受薛家燕嘅《家天下》訪問,有報道指家燕姐被選為兒童及青少年心中嘅好媽媽,家燕姐話:「我都有啲意外,覺得幾搞笑,可能我最近做嗰啲角色都係好媽媽啦!」李晉緯將會同家燕姐一齊主持名為《家燕媽與緯囝囝》嘅新環節,同大家分享親子心得。

王賢誌冧寶珠姐捐衫
王賢誌噚日喺尖沙嘴搞嘅賣二手衫籌款活動,正式開始後反應都幾熱烈。
有名陳慧珊fans竟花費咗約七千蚊去買佢偶像嘅衫,亦有兩名歌迷花咗四千蚊買Twins嘅衫。噚日王賢誌話重有陳寶珠同林嘉欣嘅衫賣喎。