香港回歸後日漸大陸化，個人講面子，單位要形象，就算幾乎係獨市生意嘅華人永遠墳場管理委員會，最近都學人拍短片搞宣傳。廣告片長4分半鐘，請咗個小妹妹同伯伯做臨記扮兩爺孫玩親情之餘，仲出動直升機拍攝，鳥瞰維港同各個華永會墳場景觀，重金巨製，夠晒霸氣。

料製作費逾50萬

華永會正職管理墳場，拍宣傳片做形象工程做法無厘頭，華永會發言人稱宣傳片內容係介紹該會歷史、墳場設施、服務同回饋社會撥款項目等等，在網站同轄下場地播放，至於花咗幾多錢攝製，華永會拒絕透露。
華永會係法定非牟利組織，主席係民政事務局局長曾德成，食物環境衞生署同地政總署署長就出任官守委員；華永會賣陰宅滾存嘅59億元基金由政府管理，但原來點樣花錢、花幾多錢拍廣告，竟然係黑箱作業，唔向公眾交代。擁有全港最多陰宅嘅華永會，唔通已經變成另類地產霸權！
八方請教廣告界猛人評估華永會宣傳片要使幾多錢，該猛人指應該冇廣告公司有香港墳場鳥瞰鏡頭，所以相信華永會呢個廣告要租直升機拍攝，全片雖然稱唔上係頂級製作，但花費50萬元至60萬元製作費肯定走唔甩。八方翻查華永會年報，過去幾年，該會每年平均廣告開支約50萬元，即係話今次拍短片塗脂抹粉，分分鐘已經使咗過去整年嘅宣傳預算。

議員質疑亂花錢

做人呢，有錢就身痕，機構亦然，華永會豪爽拍宣傳片，係因為基金嚴重水浸，上年度盈餘高達59億元。立法會議員何俊仁聽到八方話華永會最近無厘頭花錢搞形象工程，即時大嗌肉赤，質疑華永會亂花錢，又指既然基金水浸，覺得有錢冇碇使，應該減收服務費回饋市民造福社會，喺現時百物騰貴物價有升冇跌環境下，做啲嘢減輕市民負擔，肯定比拍宣傳片實際，仁哥話會喺立法會追問華永會財政問題，向民政局問責。

mailto:[email protected]