前日網上瘋傳警察同示威者衝突時，有警察拘捕倒地示威者，再以180度屈曲示威者隻手，條片出街後，網民瘋傳影片截圖，有人仲認出片中警察同80年代著名童星「小柏林」鄭柏林有七、八成似，《蘋果》記者有搵佢求證，佢一聽到係《蘋果》即cut線，不過政府呢個豬隊友，就幫手曲線證明扭曲示威者隻手嘅就係鄭柏林。

點解八方咁講？原來政府電話簿網頁係有警隊辦公電話，原本有列出警察機動部隊第一訓練隊總督察葉卓凡、第二訓練隊總督察楊銘恆、第三訓練隊總督察鄭柏林同第四訓練隊總督察鄧智兆辦公室電話同電郵，點知爆出疑似人鄭柏林扭示威者隻手條片，個網站立即刪走鄭柏林嘅資料，其他隊嘅聯絡方法就冇事，有網民相信政府唔想鄭柏林俾人起底，所以刪有關資料，但得佢office電話同電郵，其實又怕乜？反而令人覺得係「此地無銀」，之後果然有網民轉貼政府電話簿嘅截圖作新舊圖比對，恥笑政府呢個豬隊友，話間接幫網民fact check咗鄭柏林就係狂扭示威者隻手嘅警察。

電話簿完全「被消失」

政府可能見刪資料做法衰咗，俾網民拎嚟「證明」鄭柏林身份，於是又再改網頁資料，索性將4隊警察機動部隊聯絡資料全部刪走，將警察機動部隊喺政府電話簿網頁「消失」，雖然政府電話簿網免責聲明入面，列明「政府有絕對酌情權增加、刪除、暫停登載或編輯各項資料而毋須給予任何理由及事先通知」，但咁做等於無私顯見私，曲線「證明」狂拗示威者隻手嘅警察，正正係鄭柏林本人。

李八方