賭王千金何超盈今日喺澳門搞咗個「美圖秀秀人工智能機械人」畫展，超盈向來都係美圖攝影發燒友，今日佢仲親身試玩，製作卡通漫畫化嘅自己，超盈直認要追貼潮流，佢話：「好難影得唔靚。」超盈話連爸爸賭王都有試玩，仲話爸爸覺得好搞笑。

農曆新年，超盈會留喺香港同澳門，因為上年頻頻飛。講到上月被聯合國委任為教育、科技及文化組織策略性夥伴，係首位華人獲委任，又係最年輕一人，佢話：「一路冇同其他人講，考核咗一段時間，審批咗一段時間，自己都驚唔得。到簽署儀式嘅時候我只係叫咗媽咪一個，我見佢係咁耐以嚟最感動嘅一次，諗都冇諗過，佢哋畀好多機會我，喺192個國家裏面，都畀機會我上台發表對世界嘅感受同未來方向。依家會籌備一個國際性嘅活動，亦會同福布斯後人合作。」

超盈仲話太大壓力，搞到嚴重失眠，佢仲有意拉攏細路猷君搞吓啲科技文化創意項目，問到超盈會唔會多咗機會搵到志同道合嘅男仔拍吓拖？又怕唔怕愈嚟愈叻搵唔到男友？佢話：「我係最細嗰個喎，o依家冇人夠膽追我，有時識朋友要啱口型，同自己日常生活接近，依家我睇嘅topic好少人睇。」

另外，澳門小姐麥嘉欣都有出席支持，靚女當然鍾意自拍，問到鍾意同男友影相嗎？嘉欣就爆依家單身，原來佢同男友已經分咗手，佢話：「依家唔講感情，專心讀書。」嚟緊新年佢將同朋友去上海旅行。

精選娛聞，喺晒《娛果》
http://fb.com/appledailyent