噚日同大家睇過不日上映嘅日韓女性專用手機之後，係咪好想知道仲有冇其他Choice呢？其實ITU咁大，又點會冇先！好似三星呢款E420就玩得夠晒豪放，雖然係摺機咋，但外芒就採用不規則方式排放，並滲入珍珠白外殼以及像雕花嘅花紋圖案，好Fashion吓喎！講到分唇呢……得最Basic嗰種，內置VGA相機、MMS、40和弦鈴聲，係得咁多，除非你對分唇冇乜要求啦！而鍾意聽歌嘅話，可以諗定呢部Upgrade版彩蛋E570，顏色多咗又Sharp咗之外，仲追加立體聲藍芽技術及OfflineMode，最啱搭飛機嗰陣無聊聽歌，襯埋隻咁Colorful嘅Handsfree，幾絕㗎！

隔籬LG都唔執輸，主力出擊搞好KE820外，連首隻ChocolatePhoneKE800亦加入新進款式，玩完黑、白、粉紅之後，再加料放送玩金、銀兩色，睇過一眼當堂覺得佢Grand晒，廠方仲搵埋好金舖Feel嘅櫥窗設計放住佢，就算功能冇乜變過，然而感覺都矜貴晒啦！
記者：陳國輝
攝影：林栢鈞