凡事都有兩面睇，就好似姜皓文(黑仔)咁，佢今年失落香港電影金像獎最佳男配角，但係從好方面諗，已經係一個突破。而出年嘅金像獎又有機會叫糊，首先就有佢套入行以嚟首次擔正做男主角嘅《電影痴漢》，仲有佢另一部今個星期上映嘅電影《追龍》，入面佢飾演「跛豪」甄子丹嘅兄弟「大威」，嗰角色好有發揮，係一名「打死把就」嘅潮州怒漢。

為咗做好呢份工，本身係廣東寶安人嘅黑仔，搵咗潮州商會潮汕語言文化課程導師許百堅，惡補潮語3個月。許老師除咗教黑仔，佢仲專誠飛過英國教甄子丹潮州話。講番黑仔今次學咗唔少潮州話好似戲入面成日講嘅「有得食」就係「胡可積」、「食粥」係「積妹」、「堅係好」係「能烈呵」、再好啲就係「屎劈能烈」，戲入面一班兄弟成日叫甄子丹「豪哥」，潮州話係「姣hea」。黑仔話同劉德華、甄子丹合作，又點可以唔講下佢哋嘅金句，好似「今時今日咁嘅服務態度，唔得㗎」係「檢媽即渣呼冒太度，唔拿佳」，「我要打十個」就係「嘩哎啪汁雞」。

《追龍》入面黑仔飾演甄子丹嘅兄弟大威，唔少戲份都係講佢哋一班嘅兄弟情。有一場講黑仔穿吳毅將櫃桶被捉，子丹為咗兄弟不惜自爆兩樽，黑仔話:「除咗呢場有幾場戲都好沉重，好似我細佬細威劉浩龍喺泰國死嗰場。我會鍾意拍沉重戲多過喜劇，近年都拍咗唔少，都好享受。」黑仔話沉重戲比較好發揮，但係情緒波幅較大，佢話:「每次拍完呢類戲返屋企一般都會唔出聲返房，問我嘢唔答就知乜嘢事。老婆成日講笑話我精神分裂，叫我睇醫生。」黑仔話近期首次擔正做主角嘅《電影痴漢》情況仲明顯，至於有冇機會問鼎明年金像獎，佢話都係平常心。講到潮州怒漢，黑仔話最有記憶當然係當年岑建勳嘅「雷勁」，由電台做到拍埋電影。

場地提供:亞斯理衛理小學
服裝提供:JNBY
潮語指導:許百堅老師