韓國人氣綜藝節目《RunningMan》（RM）噚日播出新一集「TrueGaryShow」特輯，不過有觀眾不滿節目「為Gary宣傳」、「嘉賓變背景」而引起爭議，節目導演林亨卓今日就事件作出回應。

林亨卓導演表示：「冇諗到會引起爭議。以成員定嘉賓作主導，就好比一劍雙刃，觀眾嘅意見都分兩派。節目會因特輯主題唔同而有變，有時以嘉賓作主導，有時亦會傾向成員。」

於噚日播出一集中，一開始係成員跟嘉賓嘅無人島逃出遊戲，不過之後個節目就變成「TrueGaryShow」，節目組計畫對Gary進行「隱藏攝像機」，就係所有成員都成功完成任務，安全從無人島逃出，只有Gary獨自被留下。

節目中亦不斷重複出現「Gary嘅專輯無法錄製第十首歌曲啦」，並且以Gary是次專輯嘅主打歌作為背景音樂，因此有觀眾認為是次節目根本唔係「隱藏攝像機」，而是為Gary宣傳新碟。

不過林亨卓導演就否認：「個節目係三個星期前錄，主題都係幾個星期前就確定，Gary錄製最後一首歌、有關完成專輯嘅消息，都係錄製當日嘅凌晨先知道。」強調節目跟宣傳毫無關係。

林亨卓導演又解釋：「背景音樂通常都係用返該歌手嘅音樂。當日介紹嘉賓時，都用咗嘉賓嘅歌曲為背景音樂」