日本歌姬宇多田光絕對係個樂壇神話，佢15年前嘅處女專輯《FirstLove》，就於當地創下860萬張驚人銷量。不過性格低調嘅光妹，10年開始宣佈退隱江湖，加上母親藤圭子跳樓自殺影響，令佢更加無意復出。

光妹上年同老外再婚後簡直係消聲匿跡，早前終有更新Twitter談及生活逸事，每當佢有留言都獲廣大歌迷及網民轉發，證明仲有好多人掛住呢位傳奇天后。

最近日本播出嘅扮嘢節目，就有個A貨宇多田光登場，當節目播出之後都引起大批觀眾討論，事關呢位冒牌貨嘅側面，真係同正版有9成似樣，A貨喺節目上就話每日都有人話佢似宇多田光，連內地網民都有談論。其實以往都有唔少人話同光妹撞樣，好似日本皇室嘅佳子公主，就曾被指佢嘅衛衣Look似足光妹。