【同朱茵輪流走】拎篋要靜靜雞 Paul爆寶貝女一見父母出門即喊
黃貫中朱茵PaulBeyond盧巧音Kolor秋紅
黃貫中(Paul)、Kolor同秋紅噚晚喺新蒲崗為「Yes Rock大混戰音樂節」綵排,Paul遲咗半個鐘至到,齊人後佢哋綵排唱咗首經曲歌《歲月無聲》,Paul話:「今次合作火花好多,每日都燃燒緊,每次夾都有唔同火花,同大家識咗好多年係死黨,會搶唔同樂器玩,互換角色撞出火花,我都唔甘心只做自己嘢,見到乜就玩乜,好似打鼓、唱和音咁,今次一定會唱人哋嘅歌同Beyond嘅歌,唔唱大家唔會放過我。今年喪失咗好多音樂人,所以會唱一啲佢哋嘅歌。」
問到囡囡同老婆朱茵會唔會去捧場?Paul話:「如果媽咪唔得閒嘅話,就要留喺屋企湊女。」佢仲話老婆復工之後,大家都忙咗好多:「我同佢都係揸住行李篋做人,o依家要靜靜雞拎行李篋唔可以俾個女知,因為佢見到我哋拎篋,就會即刻偷偷地拎紙巾出嚟喊,佢o依家4歲幾扭計都應該,但實在冇辦法。」Paul話暑假會多啲陪個女補償番:「大家都話搖滾係生活,不過冇咗生活嘅時候,又點會有搖滾呢?」
Kolor被問平時綵排係咪要嘥好多時間等齊人,佢哋笑話:「呢啲豐儉由人,因好高手雲齊集,每日交流個幾鐘,時間好快過,好多嘢玩,好似去咗玩貝反斗城咁,又玩好多經曲歌唱,每個單位各自交換大家嘅樂器玩,今次除咗玩Beyond歌,仲會唱外國經曲歌,過去一年好多外國經曲歌手離開我哋,所以想做一個致敬同紀念。」問到主音Sammy到時老婆盧巧音會唔會上台做嘉賓?Sammy笑話:「佢又想又唔想,好扭擰,可能想我邀請佢。」