羅敏莊、韋綺珊、鄭敬基、陳潔靈，噚晚喺尖沙嘴文化中心為「國慶文藝晚會」擔任嘉賓，羅敏莊着住金色閃片裙，晒到一身古銅膚色，成個泰國人look咁，佢笑問：「係咪好泰國feel呢！我個裝扮好似人妖。o依家每個月去一次泰國，要入藉就好難，不過當地使費真係好低。雖然係退休生活嘅好地方，但我就冇諗過要入藉。」佢仲笑話o依家喺香港想開騷都唔係咁易，為咗尋求發展，可以組隊華人人妖歌舞團打入泰國市場。

同場嘅韋綺珊、鄭敬基，就一齊着咗紅色服裝現身，佢哋話事前冇夾過，嚟到現場見到對方至知。鄭敬基啱啱喺加拿大返港，佢早排去咗做老爺飲新抱茶，出席囝囝鄭家揚喺多倫多搞嘅婚禮。韋綺珊聽到即刻話：「千祈唔好叫我做阿婆。」鄭敬基笑問：「係咪要叫你做小姐。」韋綺珊繼續話：「真係接受唔到第時我個女生咗，嗌我做阿婆，我覺得自己仲係好後生。」