曾出演韓國神劇《太陽的後裔》男星金玟錫，憑劇集而人氣急升，今年27歲嘅佢噚晚首度襲台，並於今日舉行粉絲見面會。

喺見面會前佢今日下午先見傳媒，大會仲準備咗台灣美食畀佢品嚐，當中包括珍珠奶茶、苦茶、芒果冰等茶點，主持人呃佢苦茶等如「台灣咖啡」，當金玟錫試味後，即不動聲色話：「是很深的苦味！」得知係苦茶後佢先鬆一口氣話：「剛飲下去很苦，真的嚇死我了！」而佢就大讚台灣珍珠奶茶比韓國珍珠奶茶「深奧」。

金玟錫自稱平日有飲研磨咖啡，對咖啡豆頗有研究，但「台灣咖啡」超出佢嘅理解範圍，佢就笑話：「原來仲有呢種咖啡豆！」隨後坦言「好像飲緊中藥」，不過似乎佢承受力都幾強，可以承受呢種苦茶嘅苦澀味。

原來佢對飲料都好有研究，透露此行嚟台最想飲台灣茶，大讚：「台灣的茶有種深奧的味道！」原來係韓國嘅珍珠奶茶味道都過甜，唔多鍾意食甜嘢嘅佢就偏好台灣口味，又自爆喺留台期間要每日飲兩杯珍珠奶茶先返韓國。