【隔牆對論】

記：《蘋果》記者
劉：長遠房屋策略督導委員會成員、香港專業聯盟主席劉炳章

記： 長遠房屋策略諮詢文件提出未來10年，公私營房屋總供應為47萬個單位，社會質疑低估住屋需求，又沒有計算外來投資等因素，你如何解讀47萬個單位的數目？
劉： 47萬個單位條數嘅計法比較簡單，首先係按照政府經濟師未來10年住戶數目增長，由計算出生、死亡、移民同每日150個單程證組成。另外係重建戶包括私樓、市建局同公屋重建等，仲有包括住屋困難住戶，好似劏房戶，然後計算埋空置率。成日有人問有冇計投資客、經濟因素？最大個數喺住戶數目增長度，係政府經濟師計算，我哋冇得挑戰政府經濟師做法。

記： 公屋輪候冊突破23萬大關，但未來10年公營房屋包括公屋及居屋供應量只有約28.2萬個，如何解決基層市民上樓的問題？
劉： 28萬個單位包括公屋同居屋，唔好忘記輪候冊裏面有部份喺發咗水，因為有啲年輕人18歲就去排隊，輪到佢時可能都唔合資格啦！香港人口增長比較細，過去10年人口增長唔夠0.6%，以600、700萬人計，計計埋埋每年增長都喺4、5萬人。當你未來人口增長最多係0.8%，即每年5萬6人、10年即56萬人，實際需要19萬個單位就夠㗎啦，點解起47萬？係因為以前累積咗一大班人上唔到公屋、買唔到樓。

記： 回歸初期，房屋需求是每年房屋供應不少於8.5萬個單位，但現時700多萬人口，加上公屋輪候冊人數激增，為何長策會提出的房屋供應量每年只是約4.7萬個單位？
劉： 香港人口有兩大變化，一個係老年化，年紀大嘅人越來越多，另一個係增長（人口）放緩，令到我哋實際住屋嘅量同屋嘅類別有所變化。長策會冇參考八萬五個數，所以唔可以比較。
可能嗰陣時條數係好多舊區重建，重建嘅量大過𠵱家好多，記得董生上場後去到2001年先成立市建局，當然之前有土地發展公司啦，所以重建喺舊時多啲嘅，觀塘話𠵱家叫開工，但其實係董生嗰時做落。𠵱家舊區重建量細好多，因為市建局唔可以喺非市區地方做，𠵱家重建得嘅好多已經重建咗，𠵱家主要起新屋邨多。

記： 就不同房屋政策，諮詢文件主要用問題形式開放諮詢，但卻表明不建議重推置業貸款、租金援助等措施，原因何在？
劉： 先講劏房大家有傾過，租管過往經驗發覺你越係租管，業主越係惜貨，出租之前將租金加到好高，最終適得其反，變咗幫唔到佢哋，倒轉頭減低咗供應之餘，唧高咗租金，所以租管過往負面效果大過正面效果。置業貸款希望喺樓市供應穩定情況下先推，因為今日供應咁缺乏，再推出嚟即係幫人賣樓，唧高個樓價，而租金援助就擔心益咗劏房業主。

記： 長策會如何確保未來有足夠土地興建47萬個單位？
劉： 長策會角色係向政府建議，執行部份由政府做。長策會知悉政府做緊乜嘢，好似改變土地用途、加快（土地）審批程序、工業用地改為住宅用地等等，由政府去做，我哋做唔到乜嘢，實際上長策會喺呢個範疇係傾得唔多，nothing you can do。

記： 發展局局長日前提出社會可討論發展郊野公園，你有甚麼意見？
劉： 長策會冇傾過發展郊野公園，睇番資料40幾年前、七十年代郊野公園係諗住保護集水區，𠵱家保護集水區嘅功能基本上都唔存在，因為水都嚟自東江，所以唔需要保護集水區水源，變咗社會市民休閒、旅行功能，40幾年前嘅政策喺今日已經變咗，城市發展通常係集中喺一個地方再向周邊一路伸延出去，呢個係好自然嘅事。
郊野公園係咪絕對唔可以傾，我覺得唔需要講到咁絕，如果將來人口爆炸到1,000萬咁點，條界線係咪可以redefine過呢？

記： 長遠房屋策略諮詢文件勾劃未來10年房屋情況，到底劏房戶、青年、無樓一族未來10年前景如何？
劉： 我細嗰住喺筲箕灣寮屋，冇水，要去公廁沖涼，今日嚟講香港住屋基本有一定成就，有72萬公屋、30幾萬居屋，超過四成住喺公營房屋，好多西方國家未必有咁高比例，公營房屋角色不能抹煞。

mailto:[email protected]

有料放？想收料？入嚟【蘋果互動】啦！
【蘋果互動】是蘋果日報與讀者緊密互動、放料及收料的聚腳地。
http://fb.com/AppleDailyExchange