德國著名女球證施泰因豪斯（Bibiana Steinhaus），將會喺哈化柏林周日對雲達不來梅一戰執法，成為德甲賽場史上首位女球證。

其實德甲今次搵施泰因豪斯執法，早喺上季尾就決定咗。佢由2007/08球季開始，就已經喺德乙同德丙等聯賽度執法，直到今季先獲提升上德甲，當然佢亦執法過德國盃同女子世界盃等重要比賽，好似2011年女子世盃決賽同2012奧運女足決賽，都係佢做判官，經驗已經相當豐富。

賽前，哈化教練達迪同不來梅主帥諾利，都異口同聲讚賞施泰因豪斯嘅執法水準，認為佢會做好呢份工。

38歲嘅施泰因豪斯本身職業係警察，仲要男友就係前英格蘭球證韋比。不過佢今次執法嘅哈化，當年隊波降落德乙作賽時，已經令佢印象深刻，因為2010/11球季一場聯賽，該隊守將尼美亞曾經誤拍過佢個胸，令場面相當尷尬。不過，呢位球員已經唔喺哈化陣中，早兩年去咗達斯泰特。