當然葉太的國際視野，又豈是我們這些「土炮」可及，她指出，不少外商或專業人士移民至新加坡，無非是欣賞該處有足夠空間，若連高球場都冇，又點吸引外資？
原來外資注重嘅唔係營商機遇、法制建全、公平競爭、甚至空氣質素，而係有冇高球場！明晒！不過家陣唔明嘅反而係特區政府不宣於口的學習對象——新加坡。未知他報是有心定無意，上星期就報道該國政府已準備收回若干高球場，以作其他發展用途。
危言不攻自破，本該自摑嘴巴，葉太卻仍砌詞，還就此力陳新加坡執政黨就係因為冇好好回應中產對生活水平的要求，因而在選舉中喪失了兩個議席。葉太素以代表香港中產利益自居，現連他國中產亦關顧，真「兼愛」也。不過恕我學淺，葉太如何判斷人家政府回收高球場，係咪同議席變化有關，我夠可以話，若然「一世唔收」，輸得仲慘。
講完人哋，講返自己，葉太又指高球會亦曾舉辦過世界級賽事（主辦單位係盛事基金，即又係政府找數），並為香港經濟帶來碑（葉太果然係英文好）益。
為免予人詬病順口開河，煩請葉太開列到底香港「裨益」咗啲乜嘢？雖未知「着數」，不過自有「便宜」可佔，皆因葉太還借詞，香港若要推廣高球和培訓人才，都要有足夠設施，以供球手練習和作賽之用，如此大德，香港高球手看怕要跪謝。
可惜，粉嶺高球會過去百年，幾未曾為高球做過推廣，亦沒見實際支持本港球手的舉措。當然葉太還是可以高度肯定那些寥寥可數的國際賽事，不過對於球手來說，他們需要的是場地和更多本地業餘賽事的機會。惟球會怎捨尊貴的會員不顧，而去招呼彼等閒雜球手，除非他們是權貴子姪。
今天忽地有人善心大發為本地球手謀福，只教人想起當日，有人一樣強裝誠懇話乜嘢「葉局長無呃你……放長雙眼睇啦。」我就放長雙眼睇吓，若政府真係痛下決心收回球場，到時呢位「會員」又會怎圓其說。